أخبار عاجلة
تدريبات تأهيلية لفتحي و مروان بالأهلي -

بيتر ميمي يكشف تفاصيل تحضير فيلم "حرب كرموز" وموقفه مع "فاندام"

كشف المخرج بيتر ميمي، عن كواليس تصوير فيلم "حرب كرموز" للفنان أمير كرارة عبر حسابه الشخصي "فيسبوك".

وكتب ميمي في منشور له، "السبكي قالي عايزين نعمل فيلم وقت الاحتلال الإنجليزي حسيته بيهزر في الأول وبعدين طلع الموضوع بجد واتنين من أهم المؤلفين اعتذرا والمشروع كان تقريبًا وقف والسبكي سافر المغرب، رجع قولتله أنا كتبت الفيلم وبعته قراه وقالي تعالى حالًا- روحت له- قالي الفيلم ده هنفذه إزاي؟، قولتله نخف منه شوية، قالي لا لا نقعد نفكر وهنفذه زي ماهو مكتوب".

وأضاف، "اقنعت النجم -أمير كرارة- بالفيلم، وهو علشان بيثق فيا وافق وكان متحمس للفيلم بالرغم انه كان عنده عروض أكبر وأهم، بعدها ممثلين كتير اعتذرو علشان حسوا إن الفيلم مستحيل تنفيذه".

وأشار منشور بيتر ميمي إلى عبارة "امك صاحبتى"، والتي قال عنها مخرج "حرب كرموز": "ديه لازمة عند صديقي سيف عريبي، بيقولها لما يتخانق مع حد و كتبتها في الفيلم وأستاذ محمود حميدة، كان رافض يقولها، وقعدت أنا وعم محمد اقنعناه بالعافية، بس هو حبها بعد كده وبقى يقولها لأي حد يضايقه، على فكرة الدور ده اكتر دور تعبنا في تسكينه".

وتابع ميمي، في التحضير اتفرجت على 15 ساعة أفلام وثائقية و1200 صورة عن شكل الدبابات والمدرعات والملابس و5 كتب، ومحمد السبكي كان هو المشرف على ملابس المجموعات، كنت بجيب له صورة التفصيلة والزراير والرتب وشكل الأحذية، وهو اللي كان بينفذ، لدرجة إننا كنا عاملين لكل فرد من المجموعات شماعة عليها اسمه وملابسه كاملة علشان "مانتهش" بعد مايجو يقيسو الملابس في المكتب (المكتب كان فيه أكتر من ألف شماعة).

واستطرد مخرج فيلم "حرب كرموز": "قعدت شهر بقنع عم محمد بتصنيع دبابتين لما اقتنع صنع 5 دبابات و فجرناهم الحمدلله، اللى كان هيعمل دور الچنرال ادام النجم العالمي -ڤاندام- بس طلب فلوس كتير أوي أكتر من أجري تقريبا .. بعد كده جبنا "سكوت ادكينز" بويكا في دور الظابط المجنون و ديه كان اول مرة نجم من هوليود يكون في عمل مصري".

وأضاف، كان كل يوم تصوير أكشن بنعمل خريطة وخطوط علشان مانتهش فى وسط المجاميع الكتير أوي دول علشان الفرق كان بين الشوت والشوت في المشهد نفسه شهر أو شهرين "مش هتحس بده في الفيلم"، ومكنش حاجة بتضايقنا كمية الدخان والتراب اللى دخلت صدرنا، قعدت أنا و"دياب" نحفظ سكوت ادكينز الكام كلمة عربى اللى قالهم فى الفيلم، و"سارة الشامي" هي اللى ترجمت الفيلم.

وأردف ميمي، "آخر ضربة ضربها "أمير" لسكوت ادكينز كانت بجد، قولتله إيه يا أمير؟، قالي بلا إيه بلا بتاع مانت سايبه يضرب بجد وأنا مبتكلمش مجتش على الشلوت ده وأنا قاصد بصراحة، إحنا أصحاب يا بيتر ده خواجة يومين وماشي، "أضرب براحتك يا باشا مصر"، و بعدها أمير جاب مدرس انجليزي البيت عنده مش عارف إيه السبب لغاية دلوقتي.

واستكمل حديثه، الفيلم ده اتنفذ باتنين إنتاج فقط لا غير، أنا بتكلم بجد الفيلم ده اتنفذ بفردين إنتاج وفوقيهم محمد السبكي

وعن العربيات القديمة، أكد "ميمي" أنه تم معالجتها و تركيب مواتير جديدة ودريفت هاند و"بلاوي علشان المطاردات"، بحسب قوله.

وأشار إلى أن مصطفى خاطر "كان بيخلي يوم التصوير أحسن وألطف، بجد".

انا كنت بقعد طول الليل معرفش أنام من كتر التفاصيل وخايف من حجم الفيلم وشكله وأحيانًا كتير بحسه كبير عليا، بس ربنا ستر والحمدلله كان معايا أمير كرارة -باشا مصر- و محمد السبكي من أجمد منتجين مصر، وهو ورنا وندى ومعاهم حسين عسر وباهر رشيد.

الخبر (بيتر ميمي يكشف تفاصيل تحضير فيلم "حرب كرموز" وموقفه مع "فاندام") منقول من موقع (الوطن )
ونحن في الواقع أون لاين غير مسئولون عن محتواه.

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

السابق 4 عروض مجانية لـ"البيت الفني للمسرح" بالمهرجان القومي اليوم
التالى مهرجان «كام السينمائي» يكرم حورية فرغلي في تونس